 |
FireFly Burger
المركز الاول - التقييم : 10/10
https://www.facebook.com/FireFlyBurger
متوسط السعر: ممتاز
الموقع : جبل عمان - الدوار الأول - شارع الرينبو
المطعم خرافي ورائع واكله زاكي ومميز، ديكور المكان نوعا ما جميل بس شغل توكل وتطلع مباشرة مش اكتر، وبالنسبة للسعر كتير ممتاز بالنسبة للجودة والطعم والخدمة ممتازة والموظفين كفاءة وبشوشيين، في فرع تاني للمحل بخلدا بقدم نفس الخدمات ونفس الاسعار انا بفضل الي بخلدا وحسب مسابقة قام بها موقع جيران فاير فلاي اخد المركز الاول بالاردن، يعني من الاخر اذا بتحب البرجر وما جربت المطعم لازم تروح على السريع وتاكل فيه
Burger Makers
المركز الثاني - التقييم : 9.5/10
https://www.facebook.com/Burger-Makers-561839007248330/
متوسط السعر: جيد
الموقع: شارع المدينة المنورة بجانب شاورما غزال وفي فرع اخر بالويبدة
قبل فترة ما كنت احب هالمطعم كنت احسه بقدم برجر كتير عادي وبدون اي مميزات بس جربت فرع الويبدة كان البرجر بشهي ونكهته وطعمه زاكي وسعره مقبول بالنسبة للجودة، تفاجئت بالخدمة السريعة مع العدد الهائل من الاكيلة ان صح التعبير
بعد عدة تجارب صرت احب اكل البرجر الي بعمله، موقع المطعم في جبل الويبدة كتير مميز بالنسبة الي لانو قريب من دوار باريس والشارع الي المطعم فيه كتير بجنن، يعني اذا كنت بالويبدة ما تتردد انك تجربه
BullDog
المركز الثالث - التقييم 9/10
https://www.facebook.com/Bulldog-Hotdogmore-146594929009593/
الموقع: الفحيص بجانب دوار شاكر
متوسط السعر: جيد نوعا ما
سمعت كتير عن هالمطعم الي عمل ضجة منيحة نسبيا من اول ما فتح فحكيت خليني اروح واجرب واحكم
البرجر زاكي واله طعم مميز غير عن كل المطاعم الصراحة وعجبني المطعم نفسه بقدم هوت دوج وزاكي تقريبا مثل مطعم الهوت دوج بشارع الرينبو " وازاب " اذا صحلك ووصلت الفحيص جرب هالمطعم
OverDoze
المركز الرابع: التقييم 9/10
https://www.facebook.com/Overdoze-Burgers-519174191550184/
الموقع: جبل عمان - الدوار الأول - شارع الرينبو - بعد المعهد البريطاني - بجانب صادق هوم
متوسط السعر: ممتاز
اول ما فتح المطعم كان الاول بعيني بلا منازع وكنت كل ما بدي اكل برجر مباشرة ما افكر بغيره بس الي خلاني احطه بالمركز الرابع هو انو المطعم ما حافظ على مستواه مثل الاول صار كتير يتاخر وما يهتم بالزبائن زي اول
بس عندو برجر خرافي جدا جدا جدا ، بمسك البرجر وبحقنها حقن، لما توكل بتحس بكل النكهات وبتحس انو اللحمة طرية وغرقانه بالصوص وديكور المحل كتير حلو بالرغم من بساطته، صاحب المحل زلمة فهمان وبهتم بنوعية الاكل الي بقدمو وكتير بسالو الزبائن عن رايهم بالاكل
Wingers
المركز الخامس - التقييم 8/10
الموقع: شارع أحمد أبو عكاز، أحمد أبو عكاز - خلف سيفوي السابع
متوسط السعر: غالي شوي
المكان جدا مرتب وخرافي وبحطو موسيقى هادئة وفي خدمة الانترنت مجانا وعندو قعدات داخلية وخارجية بس المكان صغير شوي وشغل تقعد بالمطعم مش تاكل وتروح، بدير باله على زباينه والمحل كتير نظيف، البرجر زاكي ومنيح بستحق التجربة بس حسيته مش مطعم مختص برجر هو بقدم اجنحة دجاج وسلطات وكتير قصص
الي خلاني اعطيه هاي المرتبة هي السعر اولا غالي بالنسبة لغيره واهم مشكلة موجودة بهاد المطعم هي التاخير يعني بتطلب والموظف بوخد راحته زيادة عن اللزوم لحد ما تحس حالك بدك تتفجر جوع وفي كمان مشكلة بالمواقف
CampFire
المركز السادس - التقييم 8/10
الموقع: بجانب مدخل السيفوي - الدوار السابع
متوسط السعر : جيد
المطعم صغير بوسع لخمس طاولات وكتير سمعة عنو قبل ما ادخله صراحة ما جربت غير الكامب تشيكن وكانت زاكية جدا، الفرايز زاكية بس عليها نكهات غريبة على الوجه، صحابي طلبو انواع تانية وما عجبهم بالمرة حسب ما فهمت المشكلة بالنكهات
بس صراحة المطعم بستاهل يتجرب وبجوز تدمن عليه لانو كتير غريب
مشكلته الي انصدمت منها هي التوصيل، من الاخر التوصيل بهاد المطعم اشي بخزي يعني اذا فكرت توكل منو روح على المطعم وما توصي
Monkey grill
المركز السابع - التقييم 6/10
الموقع: شارع المدينة المنورة
متوسط السعر: غالي بالنسبة للجودة
مشكلة هاد المطعم نفس مشكلة كل مطاعم شارع المدينة وهي الازمة المرعبة والاصطفاف، المحل جيد نوعا ما، انا اكلت فيه اكثر من مرة لقيته وسخ ومش نظيف والطاولات كان عليهم دبق، الموظفين غير لبقيين بالمرة والي على الكاش دائما وابدا زعلان ومدايق وبتنفتر بالواحد والغريب انو بكل مرة باجي بلاقيه بحكي تلفون
طلبنا انجوس برجر ما كانت انجوس حكيت للموظف هاي مش انجوس حكالي لا هاي امريكية مية بالمية وانجوس اصلي حكيتلو اذا هاد الانجوس الاصلي اعطيني وحدة مزورة لو سمحت
انا حاطه المركز السابع لاني ما بدي اظلم المحل يعني عندو برجر زاكي والقريب على شارع المدينة بقدر يجربه
Volk's burger
المركز الثامن - التقييم 5/10
https://www.facebook.com/VolksBurgerJo/
الموقع: جبل الويبدة شارع الباعونية
متوسط السعر: غالي
المطعم صغير جدا وما بوسع وتقريبا دائما ممتلىء، نص القائمة مش موجودة اصلا يعني اذا حاب تجرب اشي جديد بحكيلك والله خالص او ما بنعملو طيب لييييييش حاطينه ؟ ، الحلو بهاد المطعم هو الموظفيين كتير خرافيين وشاطرين بالسوشال ميديا يعني كل ما تروح الا ما تلاقي كم حدا شاطر بالسوشال ميديا بوكل ببلاش عشان يشتغل للمطعم شوي
وفي كمان مشكلة انو بتاخر كتير لحد ما يوصل الطلب والغريب انهم كلهم 3 طاولات ليش بتاخر
بالنسبة للبرجر، كتير زاكي عشان هيك معطيه 5 نقاط
صحيح اذا حبيت تجرب هالمطعم حاول ما توسخ ايديك عشان مافي تواليت ولا مكان تغسل فيه
feel burger
المركز التاسع - التقييم 3/10
https://www.facebook.com/feel.amman1/
الموقع: الصويفية خلف بن العميد مبنى ضريبة الدخل
متوسط السعر: غالي قليلا بالنسبة للجودة
متوسط السعر: غالي قليلا بالنسبة للجودة
ديكور المطعم رائع وحلو واتوقع هاد الاشي الوحيد الايجابي الي انا شايفه
البرجر بتحسه كفته وعليها شوية بهارات والطعم غير مميز ابدا، الشيء الوحيد الي خلاني اضيفه الى افضل 10 مطاعم برجر بعمان هو شهرة المحل وبين كل فترة والثانية ممكن تزبط وتوكل اشي زاكي، بس بنصح بتجربته لانو الناس اذواق وفي كمية لا بأس بها بتحب هالمطعم ممكن تكون منهم
18 century
المركز الاخير: التقييم 1/10
https://www.facebook.com/18thCenturyBurger/
الموقع : صويفية
متوسط السعر: غالي جدا جدا يعني بين قوسيين حريقة
الشيء السيء الوحيد الي بخليني احط هاد المطعم باخر القائمة هو سعره مقارنة بجودته، يعني بتحس المطعم بضحك عليك عيني عينك ، البرجر جدا عادي ممكن برجر فيل تتفوق عليه ، البطاطا جدا سيئة والبيبسي او الكولا من آلة بتكون خفيفة ومرات بتخزي ومسموحلك ترجع تعبي قد ما بدك، انا بنصح بزيارته عشان تتصور فيه لانو بعطوك طواقي ومسدسات زي تاعون الكاوبوي زمان وهاي فكرة المحل اصلا، وبعد ما تتصور ما اتوقع راح تعيد التجربة
